Ишкер Имамидин Ташов өз жанын кыюуга аракет кылгандан кийин Тез жардам ооруканасында биринчи жардам көрсөтүлүп, кайра СИЗО-1ге жеткирилди. Бул тууралуу 24.kg басылмасына анын жактоочусу Нурсултан Жаныбеков билдирди.
Жактоочунун айтымында, Имамидин Ташовду дайыма конвой коштоп жүргөндүктөн, дарыгерлер аны палатага которушкан эмес. Дарыгерлер жараатын таңып, коё беришкен.
Апасы баласын дарылануу үчүн ооруканага калтырууну суранган.
Эскерте кетсек, бүгүн, 6-декабрда сот «KG Групп» курулуш компаниясынын негиздөөчүсүнүн камак мөөнөтүн узартканда, ал мойнун кесүүгө аракет кылган.
«Жарат үстүртөн, эпиглоттис аймагында, тереңдиги 1 миллиметр, кан тамырлары жабыркаган эмес. Эч кандай кан жоготуу жок», — деди Тез жардам борборунун директорунун орун басары Егор Борисов Имамидин Ташовдун абалын комментарийлеп жатып.
Эске салсак, бул экинчи суицид аракети. 29-октябрда Бишкектин Биринчи Май райондук соту ишкерге козголгон кылмыш ишин кароону баштады. Ал өз жанын кыюуга аракет кылгандан кийин СИЗОдон ооруканага жеткирилген.
Имамидин Ташовго бийликти күч менен басып алууга аракет жасаган, бийликти басып алууга ачык чакырык жасаган жана мамлекеттик чек араны мыйзамсыз кесип өткөн деген айыптар тагылган.
