Кыргызстанда аквамаданиятты жана балыкчылыкты өнүктүрүү улуттук борбору түзүлөт. Бул тууралуу журналисттерге балык чарба департаментинин директорунун орун басары Нурзамат Акпаралы уулу билдирди.

Анын айтымында, долбоор Суу ресурстары, айыл чарба жана кайра иштетүү өнөр жай министрлиги менен Корея деңиз институтунун ортосунда түзүлгөн меморандумдун алкагында «Тоң балык өстүрүү заводунун» базасында ишке ашырылат.

Инкубациялык цехтерди, лабораторияларды, турак-жайларды, ашканаларды куруу, реконструкциялоо жана техникалык жактан жабдуу, ошондой эле зарыл жабдуулар менен камсыздоо пландаштырылууда.

Фермерлерге балык өстүрүү технологиялары үйрөтүлөт.