Калпакты улуттук баш кийим макамын мыйзам менен бекитүү сунушталууда. Бул боюнча мыйзам долбоорду Жогорку Кеңештин депутаты Экмат Байбакпаев иштеп чыкты.
Мыйзам долбоор коомдук талкууга сунушталды. Анда калпакты элдик маданий мурас катары таанып, аны коргоо үчүн мыйзамдык укугу бекитилери айтылат.
Долбоордо мамлекеттик жетекчилер чет өлкөгө сапарында, ар кандай расмий жолугушууларда жалаң ак калпак кийип жүрүшү белгиленет. Негизинен ага президент, премьер-министр, парламент төрагасы милдеттендирилет.
Андан тышкары, спортчулар, маданият кызматкерлери жана башка атуулдарга эл аралык мелдеш, сынактарда калпакты кийип чыгуусу сунушталат.
Ак калпакты башка максатта колдонууга, тебелеп-тепсөөгө тыюу салынат.
Эскерте кетсек, жакында иттердин көргөзмөсүндө итке калпак кийгизип чыккан көрүнүш коомду кызуу талкуу жаратты. Иттин ээсин жазалоо да сунушталды.
Кыргызстанда 5-март Ак калпак күнү катары белгиленип келет.
