Жогорку Кеңеш «Кыргыз Республикасынын кинематографиясын мамлекеттик колдоо жөнүндө» мыйзам долбоору карап, экинчи окууда добуш берүүгө жөнөттү.
Анда аталган мыйзамдагы карама-каршылыктарды жоюу үчүн өзгөртүү киргизилүүдө. Мыйзамда аудиовизуалдык чыгармаларды цензурадан өткөрүүгө жол берилбестиги жазылган. Ушул берене эми «аудиовизуалдык чыгармаларды цензурадан өткөрүүгө» деген сөздөрүнөн кийин «ушул мыйзамдын 6-беренесинде каралгандан башка учурларда» деген сөздөр менен толуктоо сунушталууда.
Эскерте кетсек, мыйзамдын 6-беренесинде режиссерлорго чектөөлөр коюлган. Ага ылайык учурдагы конституциялык түзүлүштү күч менен өзгөртүүгө, мамлекеттин эгемендүүлүгүн жана аймактык бүтүндүгүн бузууга чакырган; согушка, зомбулукка жана ырайымсыздыкка үгүттөгөн; улуттук, этностук, рассалык, социалдык, диний кастыкты тутандырууга багытталган; улуттук же тектик артыкчылык, сабырсыздык жөнүндө, ошондой эле порнографиялык мазмундагы сценаларды фильмге киргизүүгө жол берилбейт.
Ошондон улам, мындай карама-каршылыктарды жоюу максатында, «Аудиовизуалдык чыгармаларды цензурадан өткөрүүгө» деген сөздөрүнөн кийин «ушул мыйзамдын 6-беренесинде каралгандан башка учурларда» деген сөздөр менен толуктоо сунушталууда.
