Ош шаарында Ак-Буура дарыясынын жээгинде жайгашкан бардык мыйзамсыз курулуштар сүрдүрүлүп жатат. Бул тууралуу шаардык мэрия билдирди.

Муниципалдык менчик башкармалыгы тарабынан мыйзамсыз объектилерди, анын ичинде суу коргоо зонасында жайгашкан эс алуучу жайларды демонтаждоо иштери жүрүп жатканы көрсөтүлгөн.

Муниципалитеттин маалыматы боюнча, алардын көбүнүн курулуш жана эксплуатацияга тиешелүү архитектуралык документтери жок. Мурда кыймылсыз мүлктүн ээлери жерди өнүктүрүү максатында алышкан.

«Сел учурунда Ак-Буура дарыясынын нугунда курулган бир катар объектилердин кесепетинен ылдыйкы агымда жайгашкан турак-жайларга суу агып кирип кетүү коркунучу, ошондой эле «Ошшаарканал» муниципалдык ишканасынын суу түтүктөрү селден улам бузулган», — деп эскертти мэрия.

Көрсөтүлгөн объектилердин ээлерине түшүндүрүү иштери жүргүзүлүп, тиешелүү билдирүүлөр өз убагында берилди.