Ала-Тоо аянтында жалындуу фонтан пайда болот. Бул тууралуу борбор калаанын мэриясынын маалыматтык саясат бөлүмүнүн башчысы Назгүл Жамгырчиева Фейсбук баракчасына билдирди.
Ал аянтты реконструкциялоо иштери кандай жүрүп жатканы боюнча берди. Тактап айтканда, имараттардагы терезелер алмаштырылып, өтмөктөрдүн үстүнө чатырлар орнотулуп, астына бак-дарактуу чоң гүлзарлар пайда болот.
Тепкичтердин гранити жылмаланып, тепкичтерде кыймылы чектелген адамдар үчүн пандустар пайда болду.
«Кара граниттен жасалган кичи фонтан зоналарын орнотуу иштери аяктады. Ортодо оттуу фонтандар болот. Түтүктөр тартылып, газ күйгүчтөрү орнотулду», — деди Назгүл Жамгырчиева.
Мындан тышкары сахна жана жабдуулар орнотулуп, Маданият министрлиги майрамдык программаны уюштурууда. Лазердик шоу болот деп күтүлүүдө.
