10:57
USD 78.15
EUR 92.35
RUB 1.07

Чек ара жаңжалы. Дахмадан чыгарылган тургундар өз үйлөрүнө кайтып келишти

Баткендеги кыргыз-тажик чек арасындагы жаңжалдан улам Дахмадан чыгарылган тургундар өз үйлөрүнө кайтып келишти. Бул тууралуу 24.kg агенттигине өкмөттүн Баткен облусундагы ыйгарым укуктуу өкүлчүлүгүнөн билдиришти.

Эске салсак, Дахмадан 254 киши чыгарылган, алардын көпчүлүгү балдар.

Маалыматка караганда, Кызыл жарым айдын кырсыктарга жооп кылуучу командасы Баткен облусунун тургундарына жардам берген. Алар көчүрүлгөн тургундарга тамак-аш азыктарын, ысык нан, балдарга жеке тазалык буюмдарын алып барып беришкен. Ошондой эле аялдар менен балдарга психологиялык колдоо көрсөтүшкөн.

Эске салсак, 10-январга караган түнү саат 00:40 чамасында Баткен районунун Орто-Боз айылынын Жака-Өрүк участкасы аркылуу өткөн Ош-Баткен-Исфана унаа жолунда Кара-Бак айылынын тургуну М.С.га таандык болгон «Хонда Одиссей» үлгүсүндөгү унаасына тажик жарандары тарабынан таш ыргытылып, терезелерин талкалап салышкан.

Буга чейин кыргыз өкмөтү кырдаал тынчыганын, ыкчам кырдаал толугу менен көзөмөлдө турат деп маалымат тараткан. Тажикстандын УКМКсы дагы чек арадагы жаңжал тууралуу өз версиясын айткан.