Бүгүнтөн тартып Ысык-Көлдөн келген он беш дарыгер «Алтын-Жай» пансионатында толук калыбына келтирүү курсунан өтүшөт. Бул боюнча райондун башчысы Данир Иманалиев жана Өзгөчө кырдаалдар министрлигинин өкүлдөрү дарыгерлер менен жолугушту.
Алар Бишкекте эки жумадан ашык убакыттан бери пандемияга каршы күрөштө бейтаптар менен алдыңкы сапта иштеп келишкен. Оор иш сапары аяктагандан кийин бардыгы үйлөрүнө кайтышкан.
Алардын чарчаңкы көздөрүнө караганда, узак убакыт бою эң оор кырдаалдарды өткөргөн дарыгерлердин жүздөрүнөн дагы эле болсо жылмаюуну көрөсүң. Бүгүнкү күндө дарыгерлер атайын коргоо костюмдарын кийип алып, күнү-түнү оор абалдагы бейтаптарга сары-санаа болбошу керек. Жок дегенде бир аз эс аллып алууга убакыт бар.
Башында дарыгерлер бул абдан оор болгонун ачык айтышты. Көп нерсени биринчи жолу жасап көрүү керек болду. Шаардагы медициналык мекемелердеги эң оор шарттарда иштөөгө туура келди. «Семетей» обсервациясында алар биринчи мобилдик оорукананы жайгаштырышып, оор абалда түшкөн бейтаптарды өлүмдөн сактап калуу үчүн жан үрөп эмгектеништи.
«Бишкекте пандемиянын курч мезгилинде, бейтаптардын саны кескин көбөйө баштады. Оорулууларды кароого дарыгерлер жетишсиз болуп жатты. Облустун башкармалыгы тарабынан Бишкектеги дарыгерлерди колдоо иретинде бир топ медициналык кызматкерлерди жиберүү чечими кабыл алынды. Бүгүн алар өз милдеттерин так аткарып, үйлөрүнө кайтышты», — деди аким Данир Иманалиев.
Ал дарыгерлерди жана медайымдарды кайтып келиши менен куттуктап, бардык жердештери алар менен сыймыктанарын айтты. Алардын бардыгы өздөрүнүн жарандык милдетин абийир менен так аткарышты.
Бир жума бою дарыгерлер толугу менен мамлекеттин колдоосу менен курортто болушат, андан кийин алар кайрадан ишин башташат. Биздин дарыгерлердин жардамы керек болсо, Кыргызстандын каалаган жерине барууга даяр.
