Бишкектеги күндүзгү стационарларга 4-июлдан 6-июлга чейин 3 миң 436 бейтап кайрылган. Алардын ичинен төртөө көз жумган. Бул тууралуу Бишкек шаардык мэриясынын пресс-кызматы маалымдады.
Анын айтымында, бүгүнкү күндө оорулууларды 32 дарыгер, 13 ординаттар, 63 медайым, санитарлар жана ыктыярчылар кабыл алып жатышат.
«Жеке секторлордун колдоосу менен ар бир стационарда кычкылтек концентраторлору орнотулган: Кожомкул атындагы Спорт ордосунда 10 даана, «Газпром» дене-тарбия — дарылануу комплексинде 8, Чыгыш-5 районундагы Олимпиадалык резервдеги адистештирилген балдар жана өспүрүмдөрдүн спорт мектебинде 10, «Бишкекнаабайкана» муниципиалдык ишканасында 9 концентратор бар», — деп берилет маалыматта.
Белгилей кетсек, күндүзгү стационарлар 4-июлдан тартып бейтаптарды кабыл алып башташкан. Ал жактан жарандар ийне сайдырып, тамчылатма дары куйдуруп, медициналык кызматкерлерден кеңеш ала алышат.
