Быйылкы жылдын биринчи жарым жылдыгында Кыргызстанда 118 ала качуу фактысы катталды. Бул тууралуу ИИМдин Коомдук коопсуздук кызматынын башчысы Улан Рысбеков журналисттерге билдирди.
«Быйыл 6 ай аралыгында ала качуу фактысы боюнча 118 кылмыш иши козголду. Анын 94ү нике кыюу максатын көздөгөн болсо, 12си аргасыздан нике кыюу фактысы болгон. Иштин басымдуу бөлүгү сотко өттү», -деди Улан Рысбеков.
ИИМдин маалыматына ылайык, ала качуу көбүнчө айыл жергесинде катталат.
Эске салсак, жаңы Кылмыш кодексинде ала качуу үчүн жоопкерчилик күчөтүлгөн. Анда 5 жылдан 10 жылга чейин эркинен ажыратуу каралган. Мындан тышкары жашы жете элек өспүрүм кыздарды мажбурлап турмушка бергендерге 200 миң сомдон айыппул төлөтүү каралган.
