Жогорку Кеңешти карай түкүргөн видеосун элге жарыялаган Ысык-Көл облусунун тургуну Рамис Закирияев бир ай мурда youtube канал ачып, видеоблогер катары иштей баштаган.
Видеоблогер шайлоого, жогорку окуу жайлардагы коррупцияга жана башка коомдогу көрүнүштөргө сын пикирин жарыялаган. Рамис Закирияев дипломун дагы өрттөгөн.
«Мен дипломду сатып алганмын. Эми жумушту да сатып алышым керек», — деп ал кесиби менен жумуш таба албай, дипломун пайдалана албаганын мойнуна алат.
Бирок, баардык видеолорунун ичинен түкүрүккө айып пул төлөө чарасына каршы кадамы ийгиликтүү болуп, эң көп каралып, белгилүүлүктү алып келди.
Жаңы мыйзамга ылайык коомдук жайларда түкүргөн жарандар 5 миң 500 сомго айып пулга жыгылат.
