Өзбекстан менен автобус каттамын калыбына келтирүү боюнча сүйлөшүү жүрүп жатат. Бул тууралуу өкмөттүн Жогорку Кеңештеги өкүлү Ашырбек Темирбаев билдирди.
Анын айтуусунда азыр Ош-Кокон, Ош-Фергана, Ош-Анжиян, Жалал-Абад, Кызыл-Кыяга автобустардын байланышын калыбына келтирүү маселеси 25-декабрда кыргыз делегациясынын Ташкенттеги сапарында талкууланды.
Темирбаев келерки жылы жазга жуук Ташкент-Бишкек-Балыкчы темир жол каттамы ачыла турганын кошумчалады.
«Макулдашууга ылайык жумасына бир жолу Ташкент-Балыкчы багыты боюнча Өзбекстан темир жолунун поезди каттай баштайт», — деди ал.
23-декабрдан тартып «Air Manas» компаниясы жумасына эки жолу Бишкек-Ташкент багыты боюнча учак жибере баштады. Ошондой эле бул күнү Ош-Ташкент багыты боюнча учак каттай башталды.
