Кыргызстан алтындын экспортун көбөйтүүдө

2023-жылдын январь — июль айларында Кыргызстан 7,4 тонна алтынды 463,5 миллион долларга экспорттогон. Бул тууралуу Улуттук статистика комитетинин маалыматтарында көрсөтүлгөн.

Бир айдын ичинде эле көрсөткүч 1,5 эсеге же 2,6 тоннага өскөн. 2022-жылы ушул эле убакыт аралыгында 64,4 килограмм гана алтын 609,6 миң долларга сатылган.

Баалуу металл экспортунун негизги көлөмү Швейцарияга болгон. Бул өлкөгө 5,9 тонна алтын 374,9 миллион долларга жеткирилген. Биринчи жарым жылдыкта бул көрсөткүч 3,9 тоннаны түзгөн.

Мындан тышкары, республика Гонконгго 983,3 килограмм баалуу металлды 60 миллион долларга жана Бириккен Араб Эмираттарына 450,6 килограммды 28,5 миллион долларга жеткирген.

2022-жылы жылдын жети айынын жыйынтыгы боюнча алтындын бардык көлөмү Түркияга экспорттолгон. Быйыл бул өлкөгө алтын сатылган эмес.