«Бир Бол» фракциясынын лидери Алтынбек Сулайманов Түркияда өлтүрүлгөн кытайлык ишкер Айеркен Саймаитинин айланасындагы окуяларды иликтөө үчүн түзүлгөн депутаттык комиссиянын курамынан чыкты. Бул тууралуу депутат Фейсбуктагы баракчасына жазды.
«Айеркен Саймаити боюнча түзүлгөн комиссиянын курамынан чыктым. Мени элге жаман көрсөтүү аракети күч алгандыктан, эл өкүлдөрү ушул болуп жаткан иштерди иликтеш керек деп комиссия түзүүнү демилгелегем. Ошондуктан, коомчулукта эч кандай шек жаралбашы үчүн комиссиядан чыгуу туура деп чечтим. Комиссиянын ишинин жүрүшүнө жарандык коом, журналисттер, депутаттар көз салып турат. Комиссиянын ишинин жүрүшү ачык болот деп ишенем», – деп жазган ал.
Эске салсак, Айеркен Саймаитиге байланыштуу маалыматтарды иликтөө үчүн депутаттык комиссия 21-ноябрда Алтынбек Сулаймановдун сунушунун негизинде түзүлгөн. Ага ар бир фракциядан 12 депутат кирген.
Эскерте кетсек, Стамбулда 10-ноябрда киши колдуу болгон кытай жараны Айеркен Саймаитинин ысымы «Азаттыктын» быйыл май айынын соңунда жарыялаган «Кыргызстандан чыгарылган миллиондордун изи» аттуу иликтөөсүндө аталган. Анда 700 миллион доллардын тегерегиндеги каражат Айеркен Саймаити аттуу кытайлык жаран аркылуу бир нече жыл бою күмөн жолдор менен Кыргызстандан чыгарылып келгени тууралуу кеп болгон.
Аны өлтүрүүгө шектүү катары үч адам Түркияда кармалган.
