Бишкекте «Бийлеген борбор» республикалык бий сынагы өттү. Ага өлкө аймагынан келген 2000ге жакын бийчилер катышты. Бул тууралуу Каракол шаарынан келген «Ак-Ниет» бий тобунун жетекчилери Оксана Лобова жана Сайкал Асаналиева 24.kg агенттигине билдиришти.
Маалыматка ылайык, иш-чара «Сейтек» балдардын жана өспүрүмдөрдүн улуттук борборунда болду. Анда кыргыз бийи, элдик бий, вальс, эстрада, классика, заманбап, джаз-заманбап, контемпорари, кавказ бийи жана башка бийдин түрлөрү тартууланды. Жалпы 800дөй бий калыстар тобунун сынынан өттү.
Бул жылы сынакка Каракол шаарынын өкүлдөрү 6 бий алып келген. Жыйынтыгында 5өө биринчиликти алып, бирөө алтынчы орунга илинди.
Бий боюнча Кыргызстандын чемпионаттарына 5000 сомдон сыйлыктар тапшырылды.
