Баткен облусунда жаңы томограф орнотулду

Баткен облусунун Кызыл-Кыя шаардык Жалпы дарыгерлик практикалык борборунда (ЖДПБ) мекеменин өз каражатынын эсебинен компьютердик томография аппараты сатылып алынды.

Саламаттыкты сактоо министрлигинен билдиришкендей, буга чейин мамлекеттик-жеке өнөктөштүктүн алкагында Кадамжай районунун ЖДПБсына компьютердик томограф орнотулган. Ошол эле учурда Кызыл-Кыя ЖДПБсындагы КТ-аппараты түздөн-түз облустун мамлекеттик саламаттыкты сактоо уюмунун өз каражаттарына сатылып алынган ушул деңгээлдеги биринчи жабдык болуп калды.

Жаңы жабдууну ишке киргизүү аймактын калкы үчүн заманбап диагностикалык кызматтардын жеткиликтүүлүгүн жогорулатууга жана ар кандай ооруларды өз убагында аныктоону камсыз кылууга мүмкүндүк берет. Шаарда КТ-изилдөөлөрүнөн өтүү баасы жеке медициналык уюмдарга караганда арзан болот, бул Баткен облусунун тургундары үчүн жогорку технологиялык диагностиканы кыйла жеткиликтүү кылат.