Социал-демократтар саясий партиясынын мүчөсү Фархад Баабиев кармалганын ЖМКлар Кадырбек Атамбаевге шилтеме берүү менен жазып чыгышты.
Ал бир күн мурун, 13-февралда кармалганы такталган.
УКМКнын басма сөз борбору Фархад Баабиевдин кармалганын 24.kg агенттигине тастыктап, себептери тууралуу кийинчерээк толук маалымат берүүнү убадалады.
Эске сала кетсек, 2024-жылдын 13-ноябрында саясий партиянын штабында тинтүү иштери жүргүзүлгөн. Борбор калаанын Ички иштер башкы башкармалыгы Социал-демократтар партиясынын штаб башчысы Ирина Карамушкина менен депутаттыкка талапкер Данияр Чолпонбаевдин сүйлөшүүсү делген аудиотасмадан кийин КР Кылмыш-жаза кодексинин «Добуштарды сатып алуу» беренеси боюнча кылмыш иши козголгонун билдирген .
15-ноябрда Свердлов райондук соту Темирлан Султанбеков, Ирина Карамушкина жана Роза Түрксеверди № 1 тергөө абагына камаган. Камакка алынгандар добуштарды сатып алган деп айыпталууда. Камалгандан кийин эле Социал-демократтар партиясынын лидери Темирлан Султанбеков ачкачылык жарыялаган. Ал бүгүнкү күнгө чейин уланууда.
