Кыргызстандын мурдагы президенти Аскар Акаев экс-президент макамын калыбына келтирүү өтүнүчү менен Жогорку Кеңешке кат жолдоду. Бул тууралуу маалыматты парламенттин басма сөз кызматы тастыктады.
Буга чейин “Азаттык” депутат Чолпон Султанбековага шилтеме берүү менен Аскар Акаевден бүгүн, 5-сентябрда кат келгенин жазган.
«Маселе күн тартибине дароо киргизилбейт. Биринчиден, фракциялар, алардын лидерлери, депутаттар менен сүйлөшүүлөр болот. Андан кийин бул маселе күн тартибине качан киргизилээрин маалымдайбыз», - деди эл өкүлү.
Эске салсак, Аскар Акаев өлкөнү 1990-2005-жылдары башкарган. 2005-жылдын 24-мартында үй-бүлөлүк, авторитардык жана коррупциялык бийликке каршы «Жоогазын революциясы» деп аталган төңкөрүштүн натыйжасында бийликтен кулатылган. Ошондон кийин Аскар Акаев Кыргыз Республикасынан чыгып кетип, андан бери Россияда жашап келет.
