Кыргызстандын үч университети QS World University Rankings түзгөн дүйнөдөгү эң мыкты 1503 университетинен катарына кирди. Алар И. Раззаков атындагы Кыргыз мамлекеттик техникалык университети, Кыргыз-Россия Славян университети жана Кыргыз-Түрк «Манас» университети. Бул тууралуу Билим берүү жана илим министрлиги билдирди.
Маалыматка ылайык, QS (Quacquarelli Symonds) версиясы боюнча дүйнөнүн 1503 университетинен Кыргыз-Россия Славян университети — 851-900, Кыргыз-Түрк «Манас» университети — 901-950, Кыргыз мамлекеттик техникалык университети 1201-1400 орунду эледи.
Өзгөчө макамдагы ЖОЖдордун арасынан И. Раззаков атындагы Кыргыз мамлекеттик техникалык университети жана Кыргыз-Россия Славян университети абройлуу Quacquarelli Symonds рейтингине биринчи жолу кирди.
Бул жылы рейтингинде биринчи орунду — АКШдагы Массачусетс технологиялык институти, экинчини — Лондон императордук колледжи, үчүнчүнү — Оксфорд университети ээледи.
Университеттер төмөндөгү критерийлер боюнча бааланды:
— жогорку окуу жайдын академиялык кадыр-баркы
— жумуш берүүчүлөр арасында аброю
— окутуучулар менен студенттердин санынын катышы
— окутуучулардын илимий иштерине шилтемелердин индекси
— чет өлкөлүк окутуучулардын катышы
— чет өлкөлүк студенттердин катышы
— эл аралык изилдөө тармагы
— жумушка орношуу көрсөткүчү
— туруктуулук
