Кыргызстандын аймагында SUIUN_TV лотереясын өткөрүү мыйзамсыз болуп эсептелет. Бул тууралуу Экономика министрлигине караштуу Финансы рыногун жөнгө салуу жана көзөмөлдөө мамлекеттик кызматынан билдиришти.
Мекеме жарандарды билеттерди сатып албоого жана өлкө аймагында уюштурулуп жаткан мыйзамсыз лотереяларга катышпоого чакырды.
«Лотереялар жөнүндө» Кыргыз Республикасынын мыйзамынын 20-беренесинин 1-пунктуна ылайык, лицензиясы жана уруксаты жок уюштурулган лотереядан түшкөн каражат республикалык бюджетке алынып, ден соолугунун мүмкүнчүлүгү чектелген балдарга, балдар үйлөрүнө жана интернаттарга берилет. Мыйзамсыз лотореянын уюштуруучулары Кыргызстандын мыйзамдарына ылайык кылмыш жоопкерчилигине тартылат.
