Экинчи Элдик курултайга ардактуу коноктор чакырылбайт. Бул тууралуу курултайды өткөрүү жана делегаттарды шайлоо боюнча ишти координациялоо боюнча уюштуруу комитетинин жыйынында белгилүү болду.

Видеоконференция аркылуу комитеттин мүчөлөрү, тиешелүү мамлекеттик органдардын жана президенттин облустардагы ыйгарым укуктуу өкүлдөрү маселелерди талкуулашты.

Мамлекеттик катчы Сүйүнбек Касмамбетовдун айтымында, жакында мамлекет башчысынын администрациясына айрым коомдук ишмерлерден Элдик курултайга катышуу үчүн атайын тизме түзүү сунушу түшкөн.

Ал атайын ардактуу коноктор чакырылбай турганын билдирди. «Элдик курултай реалдуу маселелерди чечүү жана жумуш алып баруу үчүн аянтча болот», — деди ал.

Алдыдагы курултайга быйыл шайланган делегаттар гана катыша алышат — алардын саны 700 адам. 640 делегат региондордон, 30 делегат этникалык топтордон жана дагы 30 адам чет өлкөлөрдөгү эмгек мигранттарынан көрсөтүлгөн.

Экинчи курултайдын ишине Жогорку Кеңештин депутаттары, министрлер кабинетинин мүчөлөрү, мамлекеттик органдардын жана жергиликтүү өз алдынча башкаруунун өкүлдөрү катышат.

Элдик курултай 15-16-декабрда Бишкекте президент Садыр Жапаровдун катышуусунда өтөт.