08:52
USD 89.40
EUR 96.65
RUB 0.98

Милиция Ниязалиеванын шайлоо штабын жаап, мөөр басып кетти

Бишкек шаардык милициясынын тергөөчүлөрү № 26 Ленин шайлоо округунан алдын ала эсеп боюнча алдыга чыккан Дамира Ниязалиеванын шайлоо штабында тинтүү жүргүзгөндөн кийин эшигин жаап, мөөр басып кетти. Бул тууралуу «Азаттыктын» кабарчысы жеринен кабарлады.

«Тинтүү иши эки сааттан ашуун болду. Кеңседен үч ноутбук жана 30 барак штабдын ишине байланыштуу документтерди алып кетишти. Алардын арасында мыйзамсыз бир нерсе бар деп айта албайм» — деди Ниязалиеванын адвокаты Эркин Ирискулбеков «Азаттыкка» берген комментарийинде.

Милиция кызматкерлери интернетте тараган аудио жазмадан соң кылмыш иши козголуп, тинтүү ошонун негизинде жүрүп жатканын маалымдашты. Тергөөчүлөр штабга 29-майда саат 21:00дөрдө барган.

Саясатчы штабдын ачкычын таба албай жатканын айткандан кийин милиция анын жардамчысынын машинесин текшерген. Ачкыч табылбаган соң ИИМдин ыкчам аракеттенчү тобу келип, штабдын эшигин кескилеп ачкан.

Тинтүү уланып жатканда Ниязалиева сыртка чыгып журналисттерге комментарий берди. Ал милиция кызматкерлери штабдын ичиндеги документтерди жана башка нерселерди текшерип жатканын белгиледи. Талапкер өзүн начар сезип жаткандыктан дарысын ичкени баратканын да кошумчалады.

Бишкек шаардык милициясы тинтүү тууралуу расмий кабар бере элек.

Мунун алдында интернетте Ниязалиеванын добушуна окшош аялдын шайлоо штабынын кызматкери делген адам менен сүйлөшүүсү тараган. Алар кишилерди ташып келүү, акча берүү жана башка темаларды сүйлөшкөн. Ниязалиева ал видеодогу сөздөр чындыкка дал келбей турганын «Азаттыкка» берген комментарийинде билдирип, аудиону «монтаж» деп сыпаттады.

Жекшембиде № 26 Ленин шайлоо округунан Жогорку Кеңештин депутаттыгына кайра шайлоо өттү. Борбордук шайлоо комиссиясынын баштапкы маалыматтарына ылайык, добуш берүүгө 125 миңдей шайлоочунун 13,95% же, 17 423ү гана катышты. 29 талапкердин ичинен алдыга чыккан Ниязалиева 35%, же 6 242 добуш алган.

Азыркы эсеп боюнча 1 317 добуш менен үчүнчү болуп келген талапкер Эртай Искаков буга чейин Ниязалиеваны добуш сатып алууга айыптап чыккан. Ал бир нече адамдын акча санап отурган видеосун таратып, алар Ниязалиеванын тарапташтары экенин билдирген.

Ниязалиева Фейсбуктагы баракчасында буга байланыштуу айыптоолорго жооп берип, социалдык тармактарда жарыяланган видеолорду «атаандаштардын каралоосу» катары сыпаттаган. Ошол эле маалда ал эч кимдин атын атаган эмес.

Эң көп окулган жаңылыктар