Бишкек ЖЭБинин казандарын газга өткөрүү меморандумуна кол коюлду

Бишкек шаарынын мэриясы жана «Газпром Кыргызстан» ЖЧКсы «Бишкекжылуулукэнерго» коммуналдык ишканасынын от казандарын жаратылыш газына өткөрүү боюнча меморандумга кол коюшту. Бул тууралуу мэриядан билдиришти.

Маалыматка ылайык, муниципалитет тарабынан мэрдин милдетин аткаруучу Балбак Түлөбаев, ал эми «Газпром Кыргызстан» ЖЧКсынын атынан Болот Абилдаев кол койду.

Документ «Бишкек шаарында, ошондой эле Чүй облусунун Сокулук жана Аламүдүн райондорунда 2021-2023-жылдарга экологиялык абалды жакшыртуу боюнча комплекстүү иш-чаралардын планын» ишке ашыруунун алкагында иштелип чыккан. Планга ылайык, 2021-жылдын 1-октябрына чейин «Бишкекжылуулукэнерго» коммуналдык ишканасынын 19 от казаны жаратылыш газына өткөрүлөт.

Белгилей кетсек, «Бишкекжылуулукэнерго» коммуналдык ишканасы 66 от казанды камтыйт, анын ичинде: 21 от казан — көмүр менен, 23- газ менен, 11-электр энергиясы жана 11-бириккен. Жылына шаардык бюджеттен от казандарын кармоого жана тейлөөгө болжол менен 36 миллион сом бөлүнөт.