08:36
USD 73.77
EUR 82.01
RUB 1.04

Курсан Асанов 13-октябрга чейин үй камагында болот

Ички иштер министринин мурунку орун басары Курсан Асанов 13-октябрга чейин үй камагына чыгарылды. Мындай чечимди Биринчи Май райондук соту кабыл алды.

Соттун чечими менен Курсан Асанов үйүнөн саат 22:00дөн 6:00гө чейин чыга албайт.

Курсан Асанов өзүнө тагылган күнөө тууралуу түшүндүрмө берүүдөн баш тартты. Болгону ал тергөөнүн аргументтерине макул эместигин, адилеттүүлүккө ишене тургандыгын айтты.

Эске салсак, 13-августта премьер-министрдин буйрутмасы менен ички иштер министрлигинин орун басары Курсан Асанов ээлеген кызматынан бошотулду.

«ИИМдин ички иликтөө кызматы 7-8-августтагы окуялардын жүрүшүндө массалык башаламандыктардын алдын алууда, коомдук коопсуздукту сактоодо, Алмазбек Атамбаевди кармап алып келүүгө багытталган иш-чаралардын жүрүшүндө ички иштер министринин орун басары Курсан Асановдун ишмердүүлүгү боюнча кызматтык иликтөө жүргүзүлдү. Кызматтык иликтөөнүн жыйынтыгы менен милициянын кызыкчылыгын саткандыгы жана ага карата ишенимдин жок болгондугу аныкталгандыгы үчүн ИИМдин орун басарлык кызматынан Курсан Асановду бошотуу тууралуу сунуш берилген. Учурда кызматтык иликтөөнүн жыйынтыгы Кыргыз Республикасынын Башкы прокуратурасына юридикалык баа берүү үчүн жиберилди», -деп айтылат маалыматта.