10 күн мурун унаасы менен дайынсыз кеткен Чаткал районунун эки жашоочусунун биринин сөөгү табылды. Бул тууралуу ӨКМнын басма сөз кызматы билдирди.
Маалыматка караганда, Каныш-Кыя айыл аймагынын Айгыр-Жол айылынын 23 жана 21 жаштагы тургундары «Daewoo Matiz» үлгүсүндөгү унаасы менен үйдөн чыгып кеткен боюнча кайтып келишкен эмес.
25-июнда Чаткал дарыясынын жээгинен алардын документтери жана жеке буюмдары табылган.
Алдын ала алынган маалыматка ылайык, 1-июль күнү 21 жаштагы жигиттин сөөгү суудан табылып, туугандарына өткөрүп берилди.
Экинчи жаранды издөө иштери улантылууда.
