Премьер-министр Сапар Исаков өз фондунан жол кырсыгынын натыйжасында жубайы каза таап, ал эми эки жашар кызы ооруканага түшүп, дарыгерлер анын бутун ампутациялоого туура келген Жыргалбек Чотонов үчүн 100 000 сом бөлүү жөнүндө буйрукка кол койду. Бул тууралуу өкмөттүн маалымат кызматы кабарлайт.
Эскерте кетсек, 9-февралында Бишкек шаарынын Витебск жана Элебесов көчөлөрүнүн кесилишинде кичи автобустун айдоочусу жол боюнда бала кармап турган аялды сүзүп кеткен. Жыргалбек Чотоновдун жубайы кырсык болгон жерде мерт кетип, эки жашар кызы бутунан айрылды.
