Президент Садыр Жапаров бүгүн, 15-ноябрда Ош облусунун жаңы түптөлгөн Жаңы-Барак айылынын тургундары менен жолугушуу учурунда жарандарга кайрылып, алдыда боло турган жергиликтүү кеңештердин депутаттарын шайлоого жигердүү катышууга чакырды.Бул тууралуу мамлекет башчысынын басма сөз кызматы билдирди.
Мамлекет башчысы бул саясий иш-чаранын өлкөбүздүн алдыга жылышындагы маанилүүлүгүн айтып, добуш берүү жарандык милдетти аткаруу эле эмес, шайлоого катышуу маданиятын да калыптандыруу экенин белгиледи.
Ал жергиликтүү кеңеш деп кайдыгер карабай, жергиликтүү деңгээлдеги көйгөйлөрдү көтөрүп, элге кам көрө турган талапкерлерди колдоо зарылдыгына көңүл бурду.
Президент жарандарды өз конституциялык укуктарын пайдаланууга чакырып, шайлоого активдүү катышуу — коом турмушуна кошкон салым экенин белгилей кетти.
Мындан тышкары, мамлекет башчысы шайлоо системасын автоматташтыруунун аркасында добуш берүү процесси ачык-айкын жана ишенимдүү болуп калганын айтты. Ал киргизилген жаңычылдыктар манипуляция жасоого тобокелдиктерди жараткан процедураларды жокко чыгарууга мүмкүндүк бергенин эске салды.
Президент Садыр Жапаров ошондой эле жарандарды добуштарын сатпоого чакырып, мындай аракеттер жакынкы беш жылда өлкөнүн тагдырына таасир этиши мүмкүн экенин айтты.
Ал адилет шайлоо ар бир адамдын катышуусун талап кылаарын белгилеп, шайлоочуларды сатып алуу аракеттерине каршы турууга чакырып, татыктуу депутаттарды шайлоо үчүн жарандардын колдоосу абдан маанилүү экенин баса белгиледи.
