Транспорт жана коммуникациялар министрлигине караштуу Жол башкармалыгы узундугу 4,2 чакырымды түзгөн Кызыл-Таш — Зардалы жолунун курулушуна кайрадан тендер жарыялады. Бул тууралуу мамлекеттик сатып алуулар порталында айтылат.
Лоттун суммасы өзгөргөн жок — жол курууга 389,2 млн сом сарптоо пландалууда.
Акыркы сынак жараксыз деп табылып, ага катышуу үчүн «Жалалабат СМУ ТТ» жабык акционердик коому гана арыз берген.
Эскерте кетсек, буга чейин президент Садыр Жапаров Зардалы айылына барып, алыскы айылга жолдун курулушу 2025-жылдын жаз айларында башталып, андан соң конушту электр энергиясы менен камсыздоо иштери жүргүзүлөрүн айткан.
Белгилей кетсек, Зардалы аймагы айыл статусун 2016-жылы алган. Ага бир гана таштак жол менен жетүүгө болот, ал май айынан баштап гана жеткиликтүү болот. Кыштын келиши менен тургундар сырткы дүйнө менен байланышсыз калышат.
