Кыргыз милициясынын түзүлгөндүгүнүн 100 жылдыгына карата борбордук Ала-Тоо аянтында салтанаттуу иш-чара өттү. Ага президент Садыр Жапаров, министрлер кабинетинин мүчөлөрү, министрлик жана ведомстволордун жетекчилиги, күч түзүмдөрүнүн ардагерлери жана Ички иштер министрлигинин башчысы Улан Ниязбеков катышты.
Иш-чаранын алкагында Советтик Кыргызстандын атчан милициясы, МАИнин эски техникалары жана укук коргоо органдары тарабынан коомдук коопсуздукту камсыз кылуу үчүн колдонулган заманбап унаалар параддык курамдан өтүштү. Жарандар жол инспекторлору колдонгон жөнөкөй унааларды, суу аткычтарды, брондолгон жол тандабастарды, автобустарды, полициянын кайыктарын, жада калса тик учактарды көрүштү.
