Акыркы бир жыл ичинде «Кыргыз почтасы» мамлекеттик ишканасынын кызматкерлерине карата 10 кылмыш иши козголду. Бул тууралуу «Республика-Ата Журт» фракциясынын отурумунда аталган ишкананын жетекчиси Марс Наспеков билдирди.
Анын айтымында, «Кыргыз почтасы» системаны автоматташтырып, акчаны банк аркылуу которуу ниетинде.
«Накталай акчалар биздин кызматкерлер үчүн азгырык болууда. Азыр Бүткүл Дүйнөлүк банктын долбоору боюнча, системаны автоматташтыруу иштерин жасап жатабыз. Эгерде пенсия банк аркылуу которулуп турса, ага алуучулардан башка эч ким кол сала албайт», -деди Марс Наспеков.
Анын айтымына караганда, былтыр 10 кылмыш иши козголгон. Ал эми уурдалган акчалар 4 миллион сомду түзгөн.
