Москва облусунун Серпухов шаарындагы темир жол станциясынан алыс эмес жерде табылган беш жаштагы тажик кыздын сөөгүн шаршембиде Тажикстанга алып келишет.
Ваиданын атасы Абдусалом Саидов кызынын сөөгү соттук-медициналык экспертизадан кийин моргдо экенин билдирди.
Ваиданын өлтүрүлүшү боюнча кылмыш иши козголду.
Орусиялык ММКлардын маалыматы боюнча беш жаштагы Ваида 22-июлда үйүнүн алдында ойноп жаткан маалда жоголгон. Анын сөөгү эртеси күнү темир жолдун жээгиндеги спорттук баштыктан табылган. Соттук-медициналык экспертизада кыз зордукталып, андан кийин бычак менен сайылып өлтүрүлгөнү аныкталган.
Тергөө комитетинин Москва облустук башкармалыгы кылмышка шектүү катары 28 жаштагы жергиликтүү жашоочу, кыздын ата-энесинин кошунасы Александр Семин кармалганын билдирди. Анын үйүндө кыздын бут кийиминин жана манжаларынын издери табылган.
