Бишкек-Ош унаа жолунун үч жерине кар көчкү түшүп, унаа жолу убактылуу жабылды. Бул тууралуу ӨКМнын басма сөз кызматы билдирди.
Маалыматка ылайык, көчкү саат 13:30 чамасында Бишкек-Ош унаа жолунун 260- чакырымына, ушул эле саатта Жалал-Абад облусунун Чаткал районундагы Красная-Горка-Ак-Таш унаа жолунун 4-9-чакырымына жана Ала-Бука-Жаңы-Базар-Кировка унаа жолунун 99-100-чакырым аралыгына түшкөн.
Алдын ала маалымат боюнча жабыркагандар жана каза болгондор жок. Жолду тазалоо иштери жүрүп жатат.