Жогорку Кеңештин депутаттык тобу 16-январда Сокулук районунун Дача-СУ айылына кулаган «Боинг-747» учагындагы жүктүн ээсине байланыштуу иликтөөнү жыйынтыктады. Бул тууралуу парламенттин депутаты, комиссиянын мүчөсү Максат Сабиров билдирди.
Анын айтымында, учактагы жүктүн көөлөмү жана кожоюндары аныкталды.
«Анда дүйнөнүн булуң-бурчунан топтолгон почта бар экен. Кыргызстанда анын бир бөлүгү гана — эки тонна чакмак калмак. Бирок, алар алгач Түркиядагы логистикалык борборго жеткирилип, андан кийин гана Кыргызстанга кайра келмек. Жүк ээлеринин тизмесинде президенттин ысмы жок», — деди Максат Сабиров.
Депутат учак Кыргызстанга май куюу үчүн конмокчу болгонун кошумчалады.
Депутаттык топ өкмөткө кырсыкка байланыштуу иштерди аягына чыгарууну буйруду.
Эскерте кетсек, буга чейин «Боинг-747» учагында президент Алмазбек Атамбаевге тиешелүү уюлдук телефон, кымбат балуу таштар, компьюьтер болгондугу айтылган.
Аба кырсыктан Дача-СУ айылынын 35 тургуну мерт кеткен.
