Улуттук коопсуздук боюнча мамлекеттик комитеттинин төрагасы Камчыбек Ташиев Ош шаарына кирүүчү альтернативдик жолдун курулушу менен таанышып, январь айына чейин бүтүрүүнү тапшырды. Текшерүүнүн видеосун Ташиевдин жактоочусу Өткүрбек Рахманов жарыялаган.
УКМКнын башчысы аткаминерлерди урушуп, Ош шаарына баруучу жолду ыкчам бүтүрүүнү талап кылды.
«Бүгүн 12-ноябрь, жол дагы деле даяр эмес! Кандай жоопкерсиздик? 12-декабрга же 12-январга чейин күтөсүзбү? Кыш келгенде, эмне кыласың? Тез бүтүрүңүз! Бир жуманын ичинде бүтүрбөсөңүз, кар жаап, асфальт төшөө мүмкүн болбой калат. Синоптиктер жуманын ортосуна чейин аба ырайы начарлайт деп жатышат, бирок дагы эле бутуңарды сүйрөп жүрөсүңөр», — деди ал ачуулана.
Камчыбек Ташиев Улуттук коопсуздук боюнча мамлекеттик комитеттин өкүлүнө Транспорт министрлигинин ишин көзөмөлгө алууну тапшырды.
«Транспорт министрлигин көзөмөлгө алыңыз. Булар иштеш үчүн ушинтип урушуп башынарга чаап коюш керекпи! Жумушуңарды кылгыла!» — деп жыйынтыктады УКМКнын башчысы.
