Кыргызстанда кылмыштуулуктун катталышы төмөндөдү. Бул тууралуу Улуттук статистика комитети Башкы прокуратуранын статистикасына шилтеме кылып билдирди.
Маалыматка ылайык, 2024-жылдын сегиз айында өлкөдө 25,7 миң кылмыш жасалган. Бул 2023-жылдын ушул мезгилине салыштырмалуу 14,8 пайызга аз.
Жалпысынан январь-август айларында 3,1 миң оор жана өзгөчө оор кылмыштар катталган (-11,9 пайыз). Алардын басымдуу бөлүгүн менчикке каршы кылмыштар түзөт — бул укук бузуулардын жалпы санынын 71 пайыздан ашыгы.
Башкы прокуратуранын маалыматы боюнча, 13 миң 1 адам кылмыш жасаган, анын 11 миң 164ү эркектер, 1 миң 837си аялдар. Кылмыштардын 8,5 пайызы 18 жашка чейинки жарандар тарабынан жасалган.
