Президенттин аппараты Бишкек шаардык мэриясынын муниципалдык кызматкерлердин жеке унааларын колдонуусун чектөө демилгесин колдоду. Бул тууралуу мэриянын басма сөз кызматы билдирди.
Тиешелүү тапшырма министрликтерге жана ведомстволорго бардык кызматкерлерге шейшемби жана бейшемби күндөрү коомдук транспортто жүрүү сунушу менен жөнөтүлдү.
Демилге шаардагы транспорттук абалды жакшыртуу, коомдук транспортко болгон суроо-талапты жогорулатуу жана жол тыгындарын азайтуу максатын көздөйт. Мындай чаралар ошондой эле коомдук транспорттун ишинде көйгөйлөрдү аныктоого жардам берип, жарандардын кыймылы үчүн ыңгайлуу шарттарды түзүүгө жардам берет.
Эске сала кетсек, шаардык муниципалитет 2024-жылдын май айында өз кызматкерлери үчүн бул эрежени киргизген жана буга чейин бул чектөөнү сактабаган муниципалдык кызматкерлерди жазалаган.
