Жаа атуу боюнча турнир Кыргызстанда биринчи жолу өткөрүлөт. Бул тууралуу туристтик компаниялардын биринин жетекчиси Сергей Глуховеров Фейсбуктагы баракчасында билдирди.
Анын айтымында, мыкты жаачылар арасындагы турнир 17-кылымда жашап өткөн атактуу жаачы Жаңыл мырзанын урматына уюштурулган.
Иш-чара 3-августка белгиленип, Бөкөнбаев айылында Салбуурун фестивалынын алкагында өтөт.
Мелдешке жети облустан тең өкүлдөр катышат.
«Турнир даанышман жетекчи катары даңазаланган, элине тынымсыз кам көргөн Жаңыл мырзанын тарыхый бейнесине арналат. Ал өз доорунун согуштук жана аңчылык өнөрүн мыкты билген. Ал жаа менен так атып, жырткыч канаттуулар — шумкарлар жана тайган иттер менен жакшы аңчылык кылган», — деп жазган Сергей Глуховеров.
