Замир Ракиев өз каалоосу менен Кыргызстандын муфтийи кызматынан кетти. Бул тууралуу Кыргызстан мусулмандар дин башкармалыгы билдирди.
Мекеменин маалыматына ылайык, Аалымдар Кеңешинин кезексиз протоколдук жыйынында Замир Ракиевдин өз каалоосу менен кызматтан кетүү тууралуу жазган арызы каралды.
«Натыйжада арызы канааттандырылып, Замир Ракиев Кыргызстан мусулмандарынын муфтийи кызматынан бошотулуп, Кыргызстан мусулмандарынын Аалымдар Кеңешинин мүчөлүгүнө кабыл алынды», — деп айтылат маалыматта.
Самидин Атабаев муфтийдин милдетин аткаруучу болуп бекитилди.
Муфтияттын ишин ырааттуу жүргүзүп, казыяттарды, аймактардагы хатибияттарды өнүктүрүп, бир топ алгылыктуу иштерди жүзөгө ашыргандыгы үчүн Кыргызстан мусулмандарынын Аалымдар Кеңешинин мүчөлөрү жана муфтияттын эмгек жамааты Замир Ракиевге ыраазычылык билдирип, мындан аркы ишине ийгилик жана ден соолук каалашты.
