Мыйзамсыз ташылган 150 миңге жакын кутуча тамеки табылды. Бул тууралуу 24.kg агенттигине Экономикалык кылмыштуулукка каршы күрөшүү мамлекеттик кызматы билдирди.
Өткөн дем алыш күндөрү финансы полициясы буга чейин катталган соттук териштирүүнүн алкагында Бишкек — Кара — Балта трассасында «Мерседес-Бенц» үлгүсүндөгү эки автоунааны кармашкан. Автоунаалардын жүк ташуучу бөлүгүн текшерүү учурунда М-М, FAST, Prestige аталыштардагы акциздик маркалары жок тамеки салынган кутулар табылды.
«Кылмыш иши боюнча чечим чыгарылганга чейин, жүктөрү бар унаалар Мамлекеттик бажы кызматынын убактылуу сактоо кампасына киргизилген. Учурда сотко чейинки тергөө амалдары жүрүп жатат, тиешеси бар адамдарды аныктоо боюнча иш-чаралар жүргүзүлүүдө», — деп билдирет Экономикалык кылмыштуулукка каршы күрөшүү мамлекеттик кызматынын маалыматында.
