«Интернет-саясат жарандык демилгеси» коомдук фонду Кыргызстандагы интернет-ресурстарына болгон DDoS-чабуулуна байланышкан окуяны иликтеп чыкты. Бул тууралуу аталган уюмдан билдиришти.
Маалыматка караганда, кечээ саат 16:00дө Factcheck.kg, Ecomonist.kg, Kloop.kg, Kaktus.media, sokol.media, vb.kg, knews.kg, Today.kg, politklinika.kg сайттарына DDoS- чабуулу жасалган. Серверлерге Кыргызстандан, Кытайдан, Орусиядан Таиланддан, Бразилиядан, Франциядан жана Индонезиядан чабуул жасалганы айтылууда.
Чабуул Райымбек Матраимовдун жубайы Уулкан Тургунова боюнча материал чыгып, эки саат өткөндөн кийин башталганын айрым ЖМКлар жазып чыгышты. Макалада Райымбек Матраимовдун жубайы Уулкан (Аманда) Тургунова өзүнө канча каражат корото тургандыгы тууралуу камтылган.
DDoS-чабуул бул — сайтты бузуу үчүн серверге бир эле учурда бир канча жол менен аракет кылуу.
