Өзбекстандын Мамлекеттик коопсуздук кызматы АКШнын жараны Закир Алиевдин кармалышынын себептери тууралуу билдирүү таратты.
Ага ылайык, Закир Алиев бир катар өлкөлөрдө террордук уюм деп табылган «Өзбекстан ислам кыймылынын» иш-аракеттерине катышканы үчүн издөөдө жүргөн.
«Закир Алиевди кармаганда ал өзүнүн мыйзамсыз иштерин мойнуна алган көрсөтмө берди. Атап айтканда, 2000-жылы «Өзбекстан ислам кыймылына» кирип ант берген, Ооганстанда машыгуудан өткөн, ошондой эле Ооганстандын укук коргоо органдарына жана коалициялык күчтөрдүн аскерлерине каршы уруштарга катышкан. 2005-жылы «Өзбекстан ислам кыймылынын» башка мүчөлөрүнүн көрсөтмөлөрүнүн негизинде ага диний-экстремисттик жана террористтик иш-аракеттерди жасаганы үчүн мамлекеттик коопсуздук кызматынын тергөө бөлүмү тарабынан № 646 кылмыш иши козголгон», — деп жазылган коопсуздук кызматтын билдирүүсүндө.
Учурда Закир Алиевге карата тиешелүү бөгөт чарасын белгилөө маселеси чечилүүдө.
46 жаштагы Алиев 16-июнда туугандары менен көрүшүү үчүн Өзбекстанга учуп келген маалда Кашкадарья облусунун Чиракчин районунда атайын кызмат өкүлдөрү тарабынан кармалган.
