Мьянманын түндүк-чыгышындагы Каунгтуп айылында болгон катуу жарылуунун кесепетинен кеминде 46 адам каза болуп, 70тен ашыгы ар кандай жаракаттарды алды.
Алдын ала маалыматтар боюнча, жарылуу тоо-кен иштерине багытталган жардыргыч заттар сакталган имаратта болгон. Жарылуунун толкуну ушунчалык күчтүү болгондуктан, жүзгө жакын турак үй жабыркаган. Көптөгөн курулуштар жарым-жартылай урап, урандылардын астында адамдар калып калышы мүмкүн экендиги айтылууда.
Учурда каза болгондордун арасында балдар да бар. Бийлик куткаруу иштеринин жүрүшүндө курман болгондордун саны дагы өсүшү мүмкүн экенин четке какпайт. Куткаруу кызматтары издөө-куткаруу иштерин улантып, урандыларды тазалоодо жана жабыркагандарга жардам көрсөтүүдө.
Учурда окуянын келип чыгуу себептери такталууда. Дүйнөлүк жалпыга маалымдоо каражаттары жана социалдык тармактардын колдонуучулары кырсык болгон жерден тартылган сүрөт жана видеолорду бөлүшүүдө. Андагы кадрлардан кыйраган имараттарды, талкаланган үйлөрдү жана катуу жарылуу толкунунун кесепеттерин көрүүгө болот.
