Сокулук районунда милиция кызматкерлери тарабынан психотроптук заттарды мыйзамсыз сактоо фактысы аныкталды. Бул тууралуу Чүй облустук ички иштер башкы башкармалыгынын басма сөз кызматы билдирди.
Маалыматка ылайык, 14-февралда Ак-Жол айылындагы стационардык МАИ постунда психотроптук заттар табылганы тууралуу маалымат түшкөн. Окуя болгон жерге ыкчам-тергөө тобу чыгып, маалымат тастыкталган.
Соттук-химиялык экспертизанын корутундусуна ылайык, алынган заттын жалпы салмагы 2,697 грамм болгон MDMB-4en-PINACA синтетикалык каннабиноиди экени аныкталган.
Бул факты боюнча КР Кылмыш-жаза кодексинин 283-беренеси (Сатпоо максатында эмес баңгизаттарды, психотроптук заттарды жана алардын аналогдорун мыйзамсыз даярдоо) менен кылмыш иши козголгон.
Шектүү аныкталып, ал 2004-жылы туулган И.Д. экендиги маалым болду. Ал кармалып, убактылуу кармоочу жайга киргизилди. Тергөө иштери уланууда.
