Кыргызстанда курулуш тармагындагы ИДП 438,5 миллиард сомду түздү

Кыргызстанда курулуш тармагындагы ИДП 438,5 миллиард сомду түздү. Бул тууралуу Министрлер кабинетинин төрагасы Адылбек Касымалиев Курулуш, архитектура жана турак жай-коммуналдык чарба министрлигинин коллегиясында билдирди.

Минкаб төрагасы 2025-жылы курулуш тармагындагы ички дүң продукциянын көлөмү 2019-жылдагы 58,5 миллиард сомго салыштырмалуу 438,5 миллиард сомду түзүп, тармак алты жылда сегиз эсеге өскөндүгун белгиледи.

Тармактын негизги жетишкендиктери:

• Курулуш тармагына 170 миллиард сомдон ашык инвестиция тартылган;
• Бул каражатка 936 социалдык объектинин курулушу бүткөрүлгөн;
• Социалдык инфраструктурага капиталдык салымдар 13,2 миллиард сомго жеткен;

Коллегиялык жыйындын алдында минкаб төрагасы борбор калаада жайгашкан Курулуш министрлигине караштуу Республикалык курулушту сертификациялоо борборунун жаңы имаратынын курулушунун жүрүшү менен таанышты.

Бул ийгиликтерге карабастан, премьер-министр бир катар системалуу көйгөйлөрдү аныктады. Ал министрликке төмөнкү милдеттерге көңүл бурууну тапшырды:

• Архитектура жана курулуш тармагындагы мыйзамдык базаны өркүндөтүү,
• Шаар куруу кодексинин долбоорун иштеп чыгууну тездетүү
• мыйзамдарды өркүндөтүү,
• курулуш тармагындагы ачыктыкты жогорулатуу,
• мамлекеттик архитектуралык-курулуш көзөмөлүнүн механизмдерин күчөтүү

Соңунда минкаб төрагасы жарандар жана бизнес үчүн жагымдуу шарттарды түзүү, бюрократиялык процедураларды кыскартуу, министрликтин ишинин ачык-айкындуулугун жана натыйжалуулугун камсыздоо зарылдыгын белгиледи.

Ал ошондой эле жетишилген натыйжаларды эске алуу менен Курулуш, архитектура жана турак-жай коммуналдык чарба министрлигинин ишине «жакшы» деген баа берилгенин айтып, ошону менен бирге тармакты мындан ары өнүктүрүү үчүн олуттуу потенциал бар экенин белгиледи.