Күн мурун 11-февралдын кечинде болгон өрттүн кесепетинен Жүрөк хирургиясы жана органдарды трансплантациялоо илимий-изилдөө институтунун имараты катуу жабыркаган. Келтирилген чыгымдын көлөмү жана өрттүн себеби азырынча айтыла элек.
Медициналык мекеменин эшик-терезелери сынып, дубалдары көө менен капталган. Учурда имарат курчоого алынып, окуя болгон жерде милиция жана өзгөчө кырдаалдар кызматынын кызматкерлери иштеп жатат.
Эске салсак, 11-февралда саат 21:00 чамасында ооруканада өрт чыккан. Өрт саат 23:15те толук өчүрүлгөн. Өрттүн кесепетинен эки бала каза болуп, 31 бейтап башка ооруканаларга которулуп, операцияга чейинки 19 бейтап үйүнө жөнөтүлгөн. Аталган факты боюнча КР Кылмыш-жаза кодексинин «Өрт коопсуздугунун эрежелерин бузуу» беренеси боюнча кылмыш иши козголду.
