Кыргызстандын саламаттыкты сактоо министри казакстандык кесиптештерине Актауга жакын жердеги авиакырсыктан жабыркаган Кыргыз Республикасынын жарандарына ыкчам жардам көрсөткөндүгү үчүн ыраазычылык билдирди.
Алымкадыр Бейшеналиев Казакстандын Саламаттыкты сактоо министри Акмарал Алназарова менен авиакырсыктан жабыркаган үч кыргызстандыктын абалы тууралуу маектешти.
Эскерте кетсек, алардын бири абалы оор, экөөнүн абалы орто экендиги айтылды.
«Казакстандык медицина адистери өз убагында керектүү жардамдарды көрсөтүштү, учурда жабыркагандар дарыгерлердин көзөмөлүндө», — деп айтылат маалыматта.
Алымкадыр Бейшеналиев казак кесиптештерине кесипкөйлүгү жана ыкчам аракети үчүн ыраазычылык билдирип, ошондой эле жарандарыбызды реабилитациялоо боюнча мындан аркы кадамдарды талкуулады.
Эске сала кетсек, 25-декабрда Казакстандын Актау шаарына жакын жерде жүргүнчү ташыган учак кулаган. Алдын ала маалыматтарга караганда, учак Бакудан Грозныйга бара жаткан. Кырсык болгон жерден буга чейин кара куту табылган. Учакта 67 жүргүнчү жана 5 экипаж мүчөсү болгон.
Акыркы маалыматтар боюнча, 38 адам набыт болгон. Дагы 29 адам, анын ичинде үч бала ооруканага жаткырылды. Казакстандын Өзгөчө кырдаалдар министрлигинин маалыматы боюнча, жабыркаган 11 адамдын абалы оор.
