Ош облусунун Ноокат районунда балдар чоподон курулган мектептерде билим алышат. Бул тууралуу Жогорку Кеңештин жыйынында депутат Советбек Рустамбек уулу билдирди.
Анын айтымында, Мирмахмудов айылында 1993-жылы ашар жолу менен чоподон курулган мектеп бар. Ал 180 орунга ылайыкталган, бирок учурда 630 бала билим алууда.
«Эч кандай шарт жок. Жаан жааганда имараттын температурасы сырттагыдай эле болот. Нымдуулук. Тиешелүү мамлекеттик органдарга кат жөнөтүлгөн. Сураныч, жардам бериңиз. Нойгут айылында 1975-жылы курулган бала бакча бар. Ал жакка 150 бала барат. Ал эми айылда 7 миң адам жашайт», — дейт Советбек Рустамбек уулу.
Эл өкүлү ошондой эле Гүлистан айыл өкмөтүндө эки гана типтүү мектеп бар экенин белгиледи. Бири 2 миң бала окуса, экинчиси 700. Экөө тең 1993-жылдары чоподон ашара ыкмасы менен курулган.
Депутат аталган айылдарга мектеп жана бала бакча курууну 2025-жылдын республикалык бюджетине киргизүүнү суранды.
