Маданият, маалымат, спорт жана жаштар саясаты министри Алтынбек Максүтов Россиянын «Пятница» телеканалынын «Царица» вокалдык шоусуна катышып жаткан таланттуу ырчы Бегимай Турусбекова менен жолукту. Бул тууралуу ведомствонун басма сөз кызматы билдирди.
Жолугушууга телеканалдын тартуу тобунун өкүлдөрү да катышты. Алтынбек Максүтов Бегимай Турусбекованы эл аралык аренадагы ийгилиги менен куттуктап, Кыргызстанды таанытууга кошкон салымы үчүн ыраазычылык билдирди. Ал улуттук өнөрдү жайылтуу жана кыргызстандык жаштарды шыктандыруу үчүн мындай чыгармалардын маанилүү экендигин белгиледи.
Эске сала кетсек, орусиялык режиссёр Елена Погребижская Бишкектеги сейил бактардын бириндеги спектаклинен кийин атактуу болгон Бегимай Турусбекова тууралуу тасма тарткан. Белгилүү журналисттин жаңы эмгеги анын YouTube каналына жайгаштырылган.
