«Сосновка» жана «Арал» постторунда жеңил жана жүк ташуучу унааларга чектөө дагы деле сакталууда. Бул тууралуу Транспорт министрлигинин басма сөз кызматы билдирди.
Маалыматка ылайык, саат 10.00гө карата Төө-Ашуу ашуусундагы түндүк жана түштүк тараптан мурда ашууда тыгылып калган жеңил унаалар үчүн жол ачык. Сосновка жана Арал транспорттук көзөмөл постторунда кечээтен тарта жүк жана жүргүнчүлөрдү ташуучу унааларга чектөөлөр киргизилди. Жакынкы арада жол кызматкерлери «Арал» постунда топтолгон жүк ташуучу унаалар үчүн түштүктөн «Бишкек — Төө-Ашуу» багытында өтмөк ачууну көздөп жатышат.Мындан тышкары, Сосновка жана Арал транспорттук башкаруу пункттарында автоунаалар кышкы дөңгөлөктөрдүн, кардын чынжырларынын жана тиешелүү жабдуулардын (күрөктөрдүн) бар-жоктугуна текшерилет.
Эскерте кетсек, Төө-Ашуу ашуусунда кардын жана муздун кесепетинен ири унаа тыгыны пайда болгон. Өзгөчө кырдаалдар министрлиги унаа тыгынында калган жарандарга ысык тамак жеткирүүдө.
Ашуудан күз-кыш шарттарына даярдалбаган унаалар өтпөйт. Бул чаралар жүк ташуучу жана жеңил унаалардын кынтыксыз өтүүсүн камсыз кылуу жана бир нече саатка созулган жасалма тыгындардын пайда болушуна жол бербөө максатында көрүлүүдө.
Бишкек-Ош жолунда транспорт жана коммуникация министринин биринчи орун басары Талантбек Солтобаев, «Кыргызавтожол» мамлекеттик ишканасынын директору Бакыт Чомоев жана анын эки орун басары бар.
Төө-Ашуу ашуусунда унаа тыгындарын алдын алуу боюнча кошумча иштерди жүргүзүү үчүн Транспорт министрлигинин жетекчилиги дагы кошумча техникаларды тартты. Ал карды тазалоо жана тайгакка каршы инерттүү материалдарды кошуу менен алектенет. Ашууда кар тынымсыз түшүрүлүп, жолдун бир бөлүгүнө кум-туз аралашмасы себилип, ашууга тыгылып калган жүк ташуучу унаалар жолдун четине чыгарылууда.
Аба ырайынын жана климаттын ыңгайсыз шарттарында каршы тилкеге чыгууга катуу тыюу салынат. Бул жолдордун татаал тоо ашуу тилкелерин тазалоо жана тайгакка каршы инерттүү материалдарды кошуу менен алектенген атайын техниканын ишин кыйындатат.
