Алмазбек Атамбаевдин мурдагы жансакчысы 5-декабрга чейин камакта болот. Тиешелүү чечимди Каракол шаардык соту чыгарды.
Маалым болгондой, судья шектүү Эркинбек Мамбеталиевдин баш коргоо чарасын узартуу боюнча тергөөчүнүн өтүнүчүн канааттандырды.
Эскерте кетсек, ал КР Кылмыш-жаза кодексинин 261-беренесинин 2-бөлүмү «Уюшкан топко катышуу» боюнча Каракол шаардык ички иштер башкармалыгынын убактылуу кармоочу жайына камакка алынган.
Буга чейин Эркин Мамбеталиев милиция кызматкерин тагыраак айтканда КР ИИМнин кызматтык кыянатчылыкка каршы күрөшүү башкы башкармалыгынын башчысы, полковник Чыныбек Алиевди өлтүргөн деп соттолгон. 2008-жылы Жогорку Сот Эркин Мамбеталиевди депутат Жыргалбек Сурабалдиев баш болгон бир нече адамдын өлүмүнө катыштыгы бар деп таап, өмүр бою эркинен ажыраткан. Бирок 2010-жылдагы апрель окуясынан кийин сот ишти карап, мунапыс колдонуп, ал түз эле сот залынан бошотулган.
25-сентябрда УКМКнын басма сөз борбору уюшкан кылмыштуу топтун мүчөсү Эркин Мамбеталиевдин 5,7 миллион долларлык мүлкү мамлекетке кайтарылганын кабарлады.
